“समृद्ध गौरीशंकर गाउँपालिकाको लागि वातावरणिय सन्तुलन सहितको अभियान”

 गौरीशंकर गाउँपालिका वडा नं. २ साविक जुँगु गाउँ विकास समितिका वडा नं. २ देखि ६ सम्मका क्षेत्रहरू समेटेर स्थानीय तह पुनर्संरचनापश्चात गठन गरिएको वडा हो। करिब १२.०५ वर्ग किलोमिटर क्षेत्रफलमा फैलिएको यस वडामा हाल करिब १,६२० जनसंख्या बसोबास गर्दै आएका छन्। प्राकृतिक सौन्दर्य, सांस्कृतिक विविधता, कृषिमा आधारित जीवनशैली तथा सामुदायिक एकताले सम्पन्न यो वडा गाउँपालिकाको सामाजिक, सांस्कृतिक तथा आर्थिक विकासमा महत्वपूर्ण योगदान पुर्‍याउँदै आएको छ।
 यस वडाको सांस्कृतिक सम्पदा अत्यन्त समृद्ध रहेको छ। विशेषगरी झाँक्री नाच, परम्परागत भजन–कीर्तन, स्थानीय देवी - देवताप्रतिको आस्था, धार्मिक अनुष्ठान तथा सामुदायिक मेलापर्वहरू यहाँका मौलिक सांस्कृतिक पहिचान हुन्। परम्परागत बाजागाजा, लोकभाका तथा धार्मिक संस्कारहरू आज पनि स्थानीय समुदायले संरक्षण गर्दै आएका छन्। यस्ता सांस्कृतिक गतिविधिहरूले सामाजिक एकता, आपसी सद्भाव र सांस्कृतिक निरन्तरतालाई मजबुत बनाएका छन्।
 यस क्षेत्रको हावापानी तथा भू - बनोटलाई मध्यनजर गर्दा अलैंची खेती विस्तार गर्ने प्रशस्त सम्भावना रहेको देखिन्छ। यदि आधुनिक कृषि प्रविधि, सिँचाइ सुविधा, कृषि प्राविधिक सेवा तथा बजार व्यवस्थापनमा आवश्यक लगानी गर्न सकिएमा यस वडाको कृषि उत्पादन र स्थानीय आयमा उल्लेखनीय वृद्धि हुने अपेक्षा गर्न सकिन्छ।
 तामाङ, शेर्पा, नेपाली (ब्राह्मण/क्षेत्री) का साथै जिरेल समुदायको उपस्थितिले वडा नं. २ लाई बहुजातीय बनाएको छ। आर्थिक आधारका रूपमा कृषि र बाख्रापालनका साथै सामुदायिक वन उपज संकलन प्रचलनमा रहेको छ, र मकै, आलुसँगै अलैंची खेतीको सम्भाव्यताले वडाको आर्थिक आधार थप फराकिलो बनाउने देखिन्छ।
 ९6% विद्युतीकरण, कच्ची तथा ग्राभेल सडक संजाल, २ वटा आधारभूत विद्यालय, १ वटा माध्यमिक विद्यालय, १ वटा स्वास्थ्य चौकी।

आधारभूत विवरण
वडा केन्द्र जुँगु
साविक गाविस साविक जुगु गाविस
प्रमुख जातजाति तामाङ, शेर्पा, नेपाली (ब्राह्मण/क्षेत्री), जिरेल
मुख्य पेशा कृषि, बाख्रापालन, सामुदायिक वन उपज संकलन
स्थानीय उत्पादन मकै, आलु, अलैंची (सम्भाव्य), दाना बाली


पर्यटकीय, धार्मिक तथा सांस्कृतिक विवरण
पर्यटकीय गन्तव्यहरू
 बगुवा
 हनुमन्ते डाँडा
 स्थानीय मेला-पर्व अनुभव
 सामुदायिक वन पदयात्रा